Brunch – saam met Annelie Bouwer
#BrunchMetAnnelie programbeskrywing:
#BrunchMetAnnelie vermaak jou weeksdae van 9 tot 12, en Annelie Bouwer is die vurige aanbieder wat vasbeslote is om aan die wêreld te bewys dat rooikoppe inderdaad meer pret het! Annelie is lief vir die lewe en alles daarin – die goeie, die slegte, en natuurlik die snaakse. Sy is oortuig daarvan dat lag werklik die beste medisyne vir enigiets is en kies om die positiewe en ligter kant van die lewe te sien. Sy is passievol in die krag van radio en weet dat alhoewel dit pret kan wees, dit met groot verantwoordelikheid gepaard gaan. Annelie is ernstig daaroor om ‘n verskil in die gemeenskap te maak. Sy inspireer luisteraars spontaan en moedig mense aan om hul ingesteldheid te verander van; “Ek kan nie help nie, want …” tot, “Miskien kan ek dit nie doen nie, maar hier is wat ek KAN doen!” Annelie het ook ‘n talent om op ‘n persoonlike, onkonvensionele en vermaaklike manier met haar luisteraars te verbind. Sy laat mense op hul gemak voel – of jy nou ‘n gas in die ateljee of luisteraar is. Sy deel haar liefde, nie net vir die lewe nie, maar vir musiek en flieks via insetsels soos die Top 20-trefferparade, en #DieGROOTskerm waar ‘n fliekkaartjie of twee gewen kan word. Diep en betekenisvolle oomblikke word gedeel tydens #LOSITBETER en #SpreekLewe. Die bekroonde “Kom Ons Praat Daaroor”-geselsprogram vorm ook deel van #BrunchMetAnnelie. Die meeste mense is van mening dat ontbyt die belangrikste maaltyd van die dag is, maar Annelie sê brunch is! Veral as dit deur hierdie rooikop bedien word! Smaaklike ete!
Annelie Bouwer 101:
Annelie is gebore op die 30ste Julie 1986 in Groblersdal.
‘n Paar van haar gunstelinge:
Kos: Kolwyntjies
Kleur: Meer as een…Groen, pers en rooi
TV-program: Friends
Naweek-aktiwiteit: Staproetes en kuier!
Reuk: Vars-gebakte brood
Dier: Luiperd
As Annelie ‘n alternatiewe loopbaan kon volg, sou sy graag ‘n ballerina wou wees. Haar grootste vrees is swaar weer en spinnekoppe! Haar ‘celebrity crush’ is Jake Gyllenhaal, en haar ‘happy place’ is die see! Sy het ‘n geweldige ‘bucket list’ en een van die items sluit in om in ‘n ‘gripen’ vegter-vliegtuig te vlieg. Annelie se gunsteling sê-ding is ‘anyway’, en haar gunsteling slagspreuk is, “I am the captain of my soul, I am the master of my fate”.
