#DieGROOTOntbyt
Die GROOT Ontbyt is die gewilde ontbytprogram wat elke weeksoggend regstreeks vanaf 06:00 – 08:00
uitgesaai word op kykNET kanaal 144.
Die GROOT Ontbyt se inhoud behels aktuele sake, van nuus en weer, tot lighartige vermaak.
Ons kuier saam met rolspelers vanuit verskeie oorde, wat insluit geliefde kunstenaars,
sportsterre, akteurs en ander bekendes.
Maak seker jy begin jou dag met Die GROOT Ontbyt – dis immers die belangrikste maaltyd van die dag!
As jy wil saam gesels, besoek ons Facebook blad of stuur 'n WhatsApp na 060-617-1743
Om te adverteer op Die GROOT Ontbyt, stuur ‘n epos aan gauteng@bdm.media
Aanbieders
JENNIFER MYBURGH
Jennifer sê sy het as kind gedroom om president te word en 'n Oscar te wen—twee beroepe wat haar op die kassie sou laat beland. Sy is dalk nog nie president of 'n Oscar-wenner nie, maar sy is op die kassie! Met haar B-Tech Drama-graad van TUT en 'n BA in Internasionale Betrekkinge van Unisa, het sy as aktrise en teatervervaardiger haar merk gemaak. Haar werk het haar al na verhoë regoor die land geneem. Sy beklemtoon dat televisie vir haar nie oor roem gaan nie, maar oor die invloed wat sy op mense se lewens het.
Jennifer se lewenslus, integriteit en talent bring voortdurende vernuwing na Die GROOT Ontbyt.
PIERRE BREYTENBACH
Pierre is 'n bekende gesig in die Suid-Afrikaanse televisiebedryf.
Hy is 'n akteur, stemkunstenaar, skrywer, komediant, seremoniemeester, aanbieder, natuurliefhebber en avontuur-motorfietsryer. Gebore in Bloemfontein en drama-gegradueerd aan UP, het Pierre 'n SAFTA gewen vir sy werk in Proesstraat en is hy genomineer vir sy rol in “Marilyn Live.” Hy woon tans in Pretoria saam met sy vrou, Anzel, en hul drie kinders. Pierre het in meer as 20 sepies en realiteitsprogramme opgetree, van Generations en Egoli tot Getroud met Rugby.
Oor sy liefde vir televisie sê Pierre: “Die kassie is deel van my. Ek is bekkig, kreatief en nuuskierig—stories is my ding. Televisie het my gekies, nie andersom nie.”
SU-AN MÜLLER-MARAIS
Su-an Müller-Marais is ‘n geliefde aanbieder op Die GROOT Ontbyt en ‘n gereelde gesig op kykNET.
Haar warmte en energie maak haar ‘n gunsteling onder kykers. Sy waardeer die interaksie met kykers en luisteraars, en sien uit na daardie unieke oomblikke wat net regstreekse uitsendings kan bring.
Su-an se aanvoeling vir die menslike ervaring—om saam te lag, kwaad te word en te huil—maak haar uitsendings vol deernis en humoristies.
Sy sê wat sy dink en is nie op haar bek geval nie. Sy kan blaf nes 'n regte hond, en dis nie die enigste geluide in dié pakkie nie.
